MALAIKA HUUNGANA NASI PALE TUNAPOWASAIDIA WAHITAJI

KESHA LA ASUBUHI 

JUMATANO, NOVEMBA 30 2022

MALAIKA HUUNGANA NASI PALE TUNAPOWASAIDIA WAHITAJI 

Au azishike nguvu zangu, Afanye amani nami; Naam, afanye amani nami. Isaya 27:5.

▶️ Kuna wengi wanaopotoka, na ambao wanahisi aibu yao na upumbavu wao. Wanayaangalia makosa na dhambi zao mpaka wanawekwa katika hali ngumu karibu na kukata tamaa. Roho hizi hatupaswi kuzipuuza. Wakati mtu anapolazimika kuogelea kinyume na mto, kuna nguvu zote za mkondo zinazomsukuma nyuma. Hebu mkono wa msaada unyoshwe wakati huo ... kama mkono wa Kaka mkubwa ulivyonyoshwa kwa Petro aliyekuwa anazama. Ongea maneno ya matumaini, maneno ambayo yataimarisha imani na kuamsha upendo.

▶️ Ndugu na dada yako, wagonjwa rohoni, wanakuhitaji wewe, kama wewe mwenyewe unavyohitaji upendo wao.... Ujuzi wa udhaifu wetu wenyewe unapaswa kutusaidia kuwasaidia wengine katika mahitaji yao machungu. Kamwe hatupaswi kupita kando ya roho hata moja inayoteseka bila kujitahidi kutoa faraja ambayo kwayo tunafarijiwa na Mungu.

▶️ Ni ushirika pamoja na Kristo, mawasiliano binafsi na Mwokozi aliye hai, ambavyo vinawezesha akili na moyo na roho kushinda juu ya tamaa za mwili.... [Waliopotea njia] wanahitajika kuushika kwa nguvu mkono ule wenye joto, kuutumainia moyo ule uliojaa huruma. Weka akili zao zikiwa zimetegemezwa juu ya wazo la uwapo wa kiungu daima kando yao, ukiwatazama daima kwa upendo wenye kuhurumia....

▶️ Unapojishughulisha na kazi hii, unakuwa na wenzi ambao hawaonekani kwa macho ya kibinadamu. Malaika wa mbinguni walikuwa kando ya Msamaria yule ambaye alimtunza mgeni aliyejeruhiwa. Malaika kutoka katika nyua za mbinguni husimama karibu na wote wanaofanya utumishi wa Mungu katika kuwahudumia wenzao. Na una ushirikiano wa Kristo Mwenyewe. Yeye ndiye Mponyaji, na unapofanya kazi chini ya usimamizi Wake, utayaona matokeo makubwa. 

🔘 Juu ya uaminifu wako katika kazi hii si tu ustawi wa wengine lakini majaliwa yako ya milele wewe mwenyewe yanategemea. Kristo anatafuta kuwainua wote ambao wataweza kuinuliwa katika ushirika pamoja na Yeye mwenyewe, ili tuwe wamoja pamoja naye kama Yeye alivyo umoja na Baba. Anaturuhusu kukutana na mateso na maafa ili atuite kutoka katika ubinafsi wetu; Anatafuta kukuza ndani yetu sifa bainishi za tabia yake- huruma, upole, na upendo. Kwa kukubali kazi hii ya huduma tunajiweka wenyewe katika shule Yake, kuandaliwa kwa ajili ya nyua za Mungu. Christ's Object Lessons, 387-389.

MAY GOD BLESS YOU ABUNDANTLY